單身巴絲打點投資至盈？
在每年雙十一「光棍節」，孖妹梗有藉口血拼，一係就話單身寂寞，要去瘋狂任性吓，一係就話「脫單」要裝身慶祝。不過，孖妹最近發現屋企原來有好多新衫未着過，真係覺得要停一停手。其實，買落一大堆未着過嘅衫，又唔打算放上網賣番出去嘅話，只係一個燒錢動作，冇咩回報可言，唔多理智。因此，如果你係單身一族，不如等孖妹陪你一齊計劃將來，做啲更實際嘅投資部署仲明智喇。
Kitty：單靠強積金應唔夠退休，買股票難預測回報，單身一族可以點儲錢？
黃：單身最好同家人住，食屋企、住屋企慳好多。
謝：先買住院入息保險，保障住院期間醫療費用賠償，咁你到時唔使手停口停。另外，亦可諗諗買分紅保險產品，會定名非保證每年紅利同終期紅利，投保年期又唔會太長，幾有彈性。
彩兒：好多人話買樓最實際，但樓市升咗咁多，單身一族應唔應該入市？
謝：好難Time the market，因此我覺得有自住需要，有財政能力，就應該買。
黃：香港始終地少人多，買第一層樓可以用嚟自住或投資，係唔會輸！當然都要自己計掂數。前排銀行同業拆息（Hibor）突然上升，供樓人士就嘗到加息滋味。
Kitty：每月唔經唔覺要供多幾百蚊，若Hibor再升，真係要日日留喺屋企做單身宅女。
黃：供樓係好大Commitment，供款期一般要20至30年，且樓市係有升跌周期，一旦樓價跌得勁，資不抵債，隨時變負資產。單身人士做高成數按揭時，要留意投資風險。
單身嘅好處，就係一個細細哋逾二百呎單位都夠住，而近期市場上細單位數目的確氾濫。另外，細單位入場費較平，可以做到高成數按揭，對單身人士來講係個好消息。
例如土瓜灣一個舊樓，實用面積三百幾呎，樓價400萬元以內，係一個唔錯嘅選擇。再者，土瓜灣即將開通鐵路，單位離鐵路嘅步程僅10分鐘，周圍交通配套完善，亦近何文田校網，係理想居住地點。
內容傳自東方日報 (11月5日)
